Home समाचार ललितपुरमा केटाकेटामै सिन्दुर हालेर विहेः पण्डित आश्चर्यमा

ललितपुरमा केटाकेटामै सिन्दुर हालेर विहेः पण्डित आश्चर्यमा

मंसिर १९, काठमाडौं ।
समाचारको शीर्षक पढेपछि तपाईलाई कौतुहल लाग्यो होला । केटा केटाको पनि बिहे ? त्यो पनि नेपालमा ? विदेशमा केटा–केटा वा केटी–केटीबीच बिहे भएकोबारे तपाईले कतै पढ्नु सुन्नु भएकै थियो होला । नेपालमा पहिलोपटक धार्मिक विधि अनुसार केटा केटाको नै बिहे भएको छ । यो समाचार लेख्दै गर्दा बेहुली बनेका केटा आफ्ना केटा श्रीमानको घरमा भित्रिइसकेका छन् । यस्तो बिहे शुक्रबार ललितपुरको कुपण्डोलमा भएको हो । रामेछाप घर भई हाल काठमाडौं थानकोट बस्ने सौरभ तामाङ ९बेहुला०ले झापाका सुरज खत्री ९बेहुली०लाई सिन्दुर हालेर बिहे गरेका हुन् । सौरभले सिन्दुर मात्र हालेनन्, बिहेको जग्गेमा मंगलसुत्र पनि पहिर्याइदिएका छन् । जसरी बिहे मण्डपमा केटा र केटीबीच बिधिपूर्वक बिहे हुन्छ उनीहरुले पनि बिधि पुर्याएर बिहे गरेका हुन् ।
बिहेमा बेहुलीले साडी चोलो घुम्टो केही लगाएका थिएनन् । बेहुला बेहुली दुवैले कोट, पाइन्ट, चस्मा र तामाङ समुदायले लगाउने टोपी लगाएका थिए । जग्गेमा पण्डितले मन्त्र पढ्दै बिधिपूर्वक उनीहरुको बिहे गराइदिए । सौरभ र सुरज दुबैजना समलिङ्गी अर्थात ‘गे’ हुन् ।
फेसबुकमा लभ, भेटेपछि बिहे
फेसबुकबाट चिनजान भएर एक वर्षदेखि प्रेम सम्बन्धमा रहेका उनीहरुले केही आफन्त र साथीभाई जम्मा भएर बिहे गरेका हुन् । बिहेमा सहभागी बेहुलाकी आमा मनकुमारी तामाङ निकै खुसी भएकी थिइन् । बेहुली सुरजका बुबाआमा भने सहभागी थिएनन् । झापामा सुरजकी आमा बिरामी भएका कारण बिहेमा आउन नसकेको उनले बताए । बिहेपछि एकअर्कालाई साथ सहयोग गर्दै श्रीमान श्रीमतीको भूमिकामा बस्ने उनीहरुले बताए । तर उनीहरुलाई नेपालको कानूनले श्रीमान श्रीमतीको रुपमा कानूनी मान्यता भने दिने छैन् । कानूनले हालसम्म समलिङ्गी बिहेलाई मान्यता दिएको छैन् । कानून बनेर आफ्नो विवाह दर्ता हुनेमा आशावादी रहेको उनीहरुले बताए । बिहेपछि उनीहरुले सन्तानका रुपमा धर्मपुत्र राख्ने योजना बनाएका छन् ।

बिहेमा सहभागी सौरभकी आमा मनकुमारी तामाङले केटा–केटा भएपनि छोरा बुहारीको सम्बन्ध लामो समय राम्रो होस् भनेर कामना गरिन् । रातोपाटीसँग कुरा गर्दै उनले भनिन्– ‘उनीहरुले आफ्नो जीवन बिताउने हो, उनीहरुको सम्बन्ध नछुटोस्, सँधै राम्रो होस्, उनीहरुको बिहेलाई मेरो साथ छ ।’ उनले छोरा सौरभ ‘गे’ भएको थाहा पाएपछि १५ वर्षअघि उनका श्रीमान अर्की श्रीमती बिहे गरेर हालसम्म बेपत्ता भएको गुनासो समेत गरिन् ।

बेहुली सुरज मेकअप आर्टिष्ट हुन् भने बेहुला सौरभ पनि जागिरे छन् । वर्षअघि फेसबुकमा भेटेपछि दुबै जनाबीच कुराकानी हुन थालेको थियो । पहिलोपटक सुरजले सौरभलाई प्रेम प्रस्ताव राखेका थिए । बिहेको पहिलो प्रस्ताव भने सौरभले गरेका थिए । सुरजले सौरभको प्रस्ताव सम्झिए– ‘तिमी धेरै राम्रो छौ, मनको पनि राम्रो छौ । हामी बिहे गरेर बसौं भन्नुभयो अनि मैले पनि हुन्छ भनेँ ।’सौरभले भने– ‘हामीले १ वर्षसम्म एक अर्कालाई बुझेर नै बिहे गर्ने निर्णय गरेका हौं । एक अर्कालाई बुझ्नका लागि समय दिएर नै आज बिहे गरेका हौँ ।’ सुरजले भने–‘मलाई उहाँको बानी बेहोरा सबै मसँग मिल्ने राम्रो लाग्यो । मेरो सबै कुरा बुझ्नुहुन्छ । मैले नभनेपनि पहिलेनै मेरो कुरा बुझ्नुहुन्छ ।’
सौरभको नराम्रो बानी भनेको छिट्टै रिसाइहाल्ने रहेको सुरजले बताए । सुरजको बिहान ढिलो उठ्ने बानी नराम्रो रहेको सौरभले बताए । उनले भने–‘बिहान ढिलो उठ्ने यसको बानी छ । सबैभन्दा पहिला मामु उठ्नुहुन्छ, त्यसपछि म उठ्छु, सबैभन्दा ढिला बिहान १० बजे चाहीँ यो उठ्छ् । अहिले छिटो उठ्ने बानी गर्दैछ ।’ बिहेअघि झन्डै २५ दिन उनीहरु घरमा सँगै बसे । कुचो लगाउने, भाडाँ धुने लगायतका घरधन्दाको काम सुरजले गर्ने गरेका छन् । सौरभकी आमाले भनिन्– ‘छोरी मान्छेले जस्तै सुरजले घरको सबै काम गर्छ ।’ फेसबुकमा १ वर्ष प्रेम गरेपछि २५ दिन अघि काँकडभिट्टाबाट सुरज सौरभलाई भेट्न काठमाडौं आएका थिए । भेटेपछि एक अर्काले झनै मन पराएको र यति छिट्टै बिहे भएको उनीहरुले बताए ।
दुई परिवारमा कुरा गरेर पारिवारिक सहमतिअनुसार नै बिहे गरेको उनीहरुले बताए । सुरजको परिवारले पनि उनको बिहेलाई स्वीकार गरेका छन् । ‘तेरो जे ईच्छा छ, जे गर्दा खुसी हुन्छस् त्यही गर’ भनेर सहमति दिएको उनले बताए । सौरभले भने आफ्नी बहिनीले यो बिहेलाई अस्वीकार गरेको कारण आफ्नो चित्त दुखेको बताए ।उनले भने–‘आजको दिनमा हल्का खुसी पनि छु, हल्का नर्भस पनि छु, आज सबैभन्दा मैले मेरो बहिनीलाई सम्झिरहेको छु । किनभने बहिनीले मलाई कहिले पनि स्वीकार गर्नुभएन् । म अलिकति दुःखी पनि छु । बहिनीले इग्नोर गरेको कुराले दुःख लाग्छ तर ममी साथमा हुनुहुन्छ, मलाई यो भन्दा के चाहियो । चेलीबेटी भनेको दाजुभाईसँग रिसाइहाल्छ फेरि बोलिहाल्छ त्यही आशामा छु । आमाले बुहारी भनेर अपनाईसकेपछि एकदिन भाउजु भनेर कसो नअपनाउला रु ’
बिहे गराउने पण्डित थिए त्रिलोचन पौडेल । जीवनमा कहिल्यै पनि केटा केटाको बिहे नगराएका उनलाई सुरुमा कसो गर्ने के गर्ने अनौठो लाग्यो । पछि एक जनालाई बर र अर्को जनालाई बधु बनाएर बिहे गराए । यौनिक तथा लैङ्गिक अल्पसंख्यकहरुका लागि काम गर्दै आएको परिचय समाज नेपालका पदाधिकारीहरुले सुरजको कन्यादान गरे ।बिहेपछि संस्थाका कार्यक्रम संयोजक मनोरञ्जन बैद्यले सरकारले छिटै समलिङ्गी बिवाहलाई मान्यता दिने कानून बनाउन आग्रह गरे । मानिसले आफ्नो लिङ्गअनुसार व्यवहार गर्न पाउने भन्ने सर्वोच्च अदालतले २०६४ सालमा गरेको फैसलाअनुसार समलिङ्गीहरु सँगै बस्ने तथा बिहे गर्ने गरेको उनले बताए । बिहेपछि बेहुली बनेका सुरजले अरु ‘गे’हरु पनि खुलेर बाहिर आउनुपर्ने बताए । साथै समाजलाई पनि स्वीकार गर्न आग्रह गरे । उनीहरुले उनीहरुको बिहेलाई कानूनी मान्यता दिन सरकारलाई पनि आग्रह गरे । यसअघि समलिङ्गी पुरुष सुरेन्द्र र तेश्रोलिङ्गी महिला राम गुरुङ ९माया०ले बिहे गरेपनि नेपालमा समलिङ्गी केटा केटाबीच भने यो पहिलो बिहे भएको हो ।

रातोपाटीबाट

यो खबर पढेर तपाईलाई कस्तो महसुस भयो ?
+1
0
+1
0
+1
0
+1
0
+1
0
+1
0
+1
0

LEAVE A REPLY

Please enter your comment!
Please enter your name here

Most Popular

बुद्धभूमिमा भोली देखि सञ्चालन हुने राष्ट्रपति रनिङ शिल्ड तथा चौथो मेयर कप खेलकुद प्रतियोगिताको तयारी पुरा

ओम प्रकाश पौडेल । कपिलवस्तु १३ फागुन ।बुद्धभूमि नगरपालिकाको आयोजनामा भोली देखि फागनु...

जनताको जीत भएको छ: मौलाना मशहूद खांं नेपाली

कपिलवस्तु, फाल्गुन १२ नेपाल कम्यूनिष्ट पार्टी (नेकपा) कृष्णानगर नगरकमिटी र राष्ट्रीय मदरसा संघ नेपालको संयुक्त...

वाणगंगा स्तरिय डोरीतान संगठन गठन

ओम प्रकाश पौडेल । कपिलवस्तु । १२ फागुन । कपिलवस्तु डोरीतान संघको आयोजनमा वाणगंगा नगरस्तरिय...

१३ दिनभित्र संसद बोलाउन सर्वोच्चको आदेश

प्रतिनिधिसभा पुनर्स्थापना काठमाडाैं : सर्वोच्च अदालतले प्रतिनिधिसभा पुनर्स्थापना गर्ने फैसला गरेको छ। प्रधानन्यायाधीश चोलेन्द्रशमशेर जबरा...

Recent Comments